വിശ്രമമില്ലാതെ മാധ്യമപ്രവർത്തകർ; ജാഗ്രതയ്ക്ക് സല്യൂട്ട്
കേരളത്തിലെ പ്രളയക്കെടുതി മാധ്യമപ്രവർത്തകർ ജനങ്ങളിലെത്തിക്കുന്നത് ഏറെ കഷ്ടപ്പെട്ട്. പ്രതികൂല കാലാവസ്ഥയിലും ഏറ്റവും പുതിയ വിവരങ്ങൾ നൽകാൻ മാധ്യമപ്രവർത്തകർ ജാഗ്രത കാട്ടുന്നു. മാധ്യമപ്രവർത്തകരെ അഭിനന്ദിച്ച് ഇന്ത്യാവിഷൻ മുൻ റീജണൽ എഡിറ്റർ ഡി ധനസുമോദ് എഴുതുന്നു
എല്ലാവരും ദുരന്തമുഖത്ത് നിന്നും സുരക്ഷിത സ്ഥാനങ്ങളിലേക്ക് മാറുമ്പോൾ തത്സമയ റിപ്പോർട്ടിങ് നടത്താനായി അപകടമുഖത്ത് റിപ്പോർട്ടർമാരും ക്യാമറാമാന്മാരും നിലയുറപ്പിക്കുകയാണ്. ഏത് ചാനൽ മാറ്റിയാലും എല്ലായിടത്തും പ്രിയങ്കരരായ കൂട്ടുകാർ മാത്രം. ഫ്രയിമിൽ കാണുന്നവരെ മാത്രമല്ല ക്യാമറാമാൻ ,ക്യാമറ അസിസ്റ്റന്റ് ,ഡ്രൈവർമാർ ,സ്ട്രിംഗർമാർ റിപ്പോർട്ടർ എടുക്കുന്ന വോയിസും വിഷ്വലും സമന്വയിപ്പിച്ചു മിനിറ്റുകൾകൊണ്ട് എഡിറ്റ് ചെയ്യുന്ന എഡിറ്റർമാർ എന്നിവരെയും ഫീൽ ചെയ്യുന്നുണ്ട്.
മറ്റുജില്ലകളിലെ റിപ്പോർട്ടർമാരെ പോലും ദുരന്തം നടക്കുന്ന സ്ഥലങ്ങളിൽ നിയോഗിക്കുന്നുണ്ട്. നല്ല താമസ സ്ഥലം കിട്ടാതെയും ,കാറിൽ ഉറങ്ങിയും ,മാറി ധരിക്കാൻ നല്ല ഡ്രസ്സ് ഇല്ലാതെയും മഴ നനഞ്ഞും റിപ്പോർട്ട് ചെയ്യുന്നത് അറിയുന്നു. ഈ ബുദ്ധിമുട്ടുകൾക്കിടയിലും കൃത്യമായി ശമ്പളം ലഭിക്കാത്തതും ഒരു തവണ പോലും ഭാര്യയെയും കുഞ്ഞിനേയും വിളിക്കാൻ കഴിയാത്ത അവസ്ഥയും മനസിലാക്കുന്നു.
എപ്പോൾ വേണമെങ്കിലും ബാറ്ററി തീർന്നു പോകാവുന്ന ഫോണുകളും വൈദ്യുതി മുടങ്ങിയ സ്ഥലങ്ങളിലെ വിഷമതകളും നിങ്ങളെ അസ്വസ്ഥരാക്കുന്നതും തിരിച്ചറിയുന്നു. ഫോൺ ഓഫായാൽ കുഞ്ഞിന്റെ പനി എങ്ങനെ ഉണ്ടെന്ന് വീട്ടിൽ തിരക്കാൻ പറ്റിയില്ല എന്നായിരിക്കില്ല മറിച്ചു ഡെസ്കിൽ നിന്നും എത്തുന്ന കോൾ എങ്ങനെ കൈകാര്യം ചെയ്യും എന്നായിരിക്കും നിങ്ങളുടെ ഉത്കണ്ഠ എന്നും അറിയാം. വാഹനങ്ങൾ എത്താത്ത സ്ഥലങ്ങളിലേക്ക് കാൽനടയായി കിലോമീറ്ററുകൾ താണ്ടുമ്പോൾ ഞാൻ നനഞ്ഞാലും ക്യാമറാ നനയരുത് എന്ന് കരുതുന്ന ക്യാമറാമാൻ ,ട്രൈപ്പോഡും തൂക്കി നടക്കുന്ന റിപ്പോർട്ടർ ,വിഷ്വൽ എത്തിക്കാൻ ബുദ്ധിമുട്ടുന്ന ഒബി വാൻ എൻജിനിയർ ,ഷിഫ്റ്റുകൾ മാറാതെ പണിയെടുത്ത് ഡെസ്കിൽ തളരുന്നവർ,തഹസിൽദാർ മുതൽ കലക്റ്റർ വരെ തുടർച്ചയായി പ്രതികരണത്തിന് വിളിച്ചിട്ടും കണക്റ്റ് ആകാതെ കുഴയുന്ന ന്യൂസ് പ്രൊഡ്യൂസർമാർ ഇവർക്കും നന്ദി…സ്വന്തം ബുദ്ധിമുട്ടുകൾ മറച്ചു മറ്റുള്ളവരുടെ ദുരിതം ഒപ്പിയെടുത്തു നാടിനെ ജാഗരൂഗരാക്കുന്ന പ്രിയപ്പെട്ട മാധ്യമപ്രവർത്തകർക്ക് സ്നേഹാഭിവാദ്യം…നന്ദി…ഉമ്മ…
(മംഗളം,ഇന്ത്യാവിഷൻ, ടിവി ന്യൂ എന്നിവിടങ്ങളിൽ പ്രവർത്തിച്ചിട്ടുള്ള ഡി ധനസുമോദ് സോഷ്യൽ മീഡിയയിൽ സജീവമാണ് )