America

യുഎസ് വിസയ്ക്ക് സാമൂഹ്യ മാധ്യമങ്ങളുടെ പ്രൊഫൈല്‍ സമര്‍പ്പിക്കണമെന്ന്

യു.എസ്​ വിസ അപേക്ഷകരിൽ നിന്ന്​ കൂടുതൽ വിവരങ്ങൾ ശേഖരിക്കാനൊരുങ്ങി ട്രംപ്​ ഭരണകൂടം. വ്യക്​തികളുടെ മുമ്പുണ്ടായിരുന്ന ഫോൺ നമ്പർ, ഇമെയിൽ വിലാസം, സാമൂഹിക മാധ്യമങ്ങളുടെ പ്രൊഫൈലുകള്‍-ഇടപെടലുകള്‍, എന്നിവയെല്ലാം പരിശോധനക്ക്​ വിധേയമാക്കാനാണ്​ നീക്കം.

രാജ്യത്തിന്​ ഭീഷണിയായേക്കാവുന്നവരുടെ വരവിനെ തടയുക എന്നതാണ് ഇതിലുടെ യു.എസ്​ ലക്ഷ്യമിടുന്നത്​. നോൺ ഇമിഗ്രന്‍റ്​ വിസക്ക്​ അപേക്ഷിക്കുന്നവരിൽ നിന്ന്​ കൂടുതൽ വിവരങ്ങൾ തേടുമെന്നാണ്​ യു.എസ്​ ഭരണകൂടം അറിയിച്ചിരിക്കുന്നത്​. സാമൂഹിക മാധ്യമങ്ങളുടെ വിവരങ്ങളോടൊപ്പം കഴിഞ്ഞ അഞ്ച്​ വർഷമായി ഇവർ ഉപയോഗിച്ചിരുന്ന ഫോൺ നമ്പറുകളുടെ വിവരങ്ങളും നൽകണം.

ഇതിനോടൊപ്പം വിസ അ​പേക്ഷകനെ എതെങ്കിലും രാജ്യത്ത്​ നിന്ന്​ പുറത്താക്കിയിരുന്നോ, കുടുംബത്തിലെ ആരെങ്കിലും തീ​വ്രവാദ കേസിൽ പ്രതിയായിരുന്നോ തുടങ്ങിയ കാര്യങ്ങളും യു.എസ്​ അന്വേഷിക്കും. ഡോണാൾഡ്​ ട്രംപ്​ അധികാരത്തിലെത്തിയതോടെയാണ്​ വിസ ചട്ടങ്ങൾ കൂടുതൽ കർശനമാക്കിയത്​. അതിവേഗത്തിൽ വിസ നൽകുന്ന സംവിധാനത്തിന്​ പല തവണ ട്രംപ്​ നിയന്ത്രണമേർപ്പെടുത്തിയിരുന്നു. എച്ച്​ 1 ബി വിസ നൽകുന്നതിലും യു.എസ്​ നിയന്ത്രണങ്ങൾ കൊണ്ടു വന്നിരുന്നു.