ഐസ്‌ക്രീം നുണയാം.. 40,000 രൂപ നേടാം..
അഹമ്മദാബാദിലെ ഹാവ്‌മോര്‍ ഐസ്‌ക്രീം കമ്പനിക്ക് ഐസ്‌ക്രീം നുണയാന്‍ ചീഫ് ടേസ്റ്റിങ്ങ് ഓഫീസറെ ആവശ്യമുണ്ട്. പ്രതിഫലം 40,000 രൂപ. വിവിധ തരം ഐസ്‌ക്രീമുകള്‍ നുണഞ്ഞ് അവയെ പറ്റി അഭിപ്രായം പറയുക, പുതു രുചികള്‍ നിര്‍ദ്ദേശിക്കുക, ഐസ്‌ക്രീം നുണയാന്‍ തനത് വഴികള്‍ ആലോചിച്ച് കണ്ടു പിടിക്കുക, ഏത് രുചിയാണ് ഹിറ്റാവുകയെന്നതിനെ പറ്റി കമ്പനിക്ക് മാര്‍ഗ്ഗനിര്‍ദ്ദേശം നല്‍കുക എന്നിവയാണ് ചീഫ് ടേസ്റ്റിങ്ങ് ഓഫീസറുടെ പണി.
അഹമ്മദാബാദിലെ കമ്പനി ഓഫീസില്‍ 2018 ജൂണ്‍ 15 മുതല്‍ 17 വരെ വെറും മൂന്ന് ദിവസം മാത്രമാണ് ജോലിയുടെ ദൈര്‍ഘ്യം. അഹമ്മദാബാദിലെത്താനുള്ള വിമാന ടിക്കറ്റ്, താമസ സൗകര്യം അടക്കമുള്ള കാര്യങ്ങള്‍ ഹാവ്‌മോര്‍ നോക്കിക്കൊള്ളും. ഐസ്‌ക്രീം നിര്‍മ്മാണ വര്‍ക്ക്‌ഷോപ്പില്‍ വച്ച് കമ്പനിയുടെ ടേസ്റ്റ് എക്‌സ്പര്‍ട്ടുകളെ പരിചയപ്പെടാം. ഇഷ്ടം പോലെ ഐസ്‌ക്രീം തിന്നാം. മറ്റ് ഐസ്‌ക്രീം പ്രേമികളെയും പരിചയപ്പെടാം. മൂന്നു ദിവസത്തെ ഐസ്‌ക്രീം തീറ്റയും കഴിഞ്ഞ് ശമ്പളവും സര്‍ട്ടിഫിക്കറ്റും നേടി തിരികെ പോരാം.
പിന്നീട് കമ്പനി പ്രത്യേക ബ്രാന്‍ഡ് പദ്ധതികളോ ക്യാംപയിനുകളോ സംഘടിപ്പിക്കുമ്പോള്‍ ഐസ്‌ക്രീം നുണയാനായി വീണ്ടും വിളിക്കും. അപ്പോള്‍ ചെന്ന് വീണ്ടും ഐസ്‌ക്രീം രുചിക്കാം. ഫ് ടേസ്റ്റിങ്ങ് ഓഫീസറാകാന്‍ ചെയ്യേണ്ടത് ഇത്രമാത്രം. യോഗ്യതകള്‍ വിവരിക്കുന്ന രണ്ട് മിനിട്ട് ദൈര്‍ഘ്യമുള്ള ഒരു വീഡിയോ തയ്യാറാക്കുക. നിങ്ങളെ വ്യത്യസ്തനാക്കുന്ന കാര്യങ്ങളും നിങ്ങള്‍ക്ക് ഐസ്‌ക്രീമിനോടുള്ള ഇഷ്ടവും കിടിലന്‍ ഐസ്‌ക്രീമുകള്‍ തയ്യാറാക്കാന്‍ എങ്ങനെ നിങ്ങളുടെ സര്‍ഗ്ഗാത്മകത ഉപയോഗിക്കും എന്നുമെല്ലാം ഈ വീഡിയോയിലൂടെ വ്യക്തമാക്കണം.
https://havmor.com/thecoolestsummerjob/apply എന്ന സൈറ്റിലെത്തി വീഡിയോ അപ് ലോഡ് ചെയ്ത് സമര്‍പ്പിക്കണം. തുടര്‍ന്ന് ഇത് കൈപ്പറ്റിയതായുള്ള കമ്പനിയുടെ ഇ – മെയില്‍ വരും. തുടര്‍ന്ന് വീഡീയോ സമൂഹമാധ്യമങ്ങളില്‍ പങ്കു വച്ച് നിങ്ങളുടെ സുഹൃത്തുക്കളുടെയും പരിചയക്കാരുടെയും ലൈക്കും ഷെയറും നേടാം. ഈ ലൈക്കും ഷെയറുമാണ് ചീഫ് ടേസ്റ്റിങ്ങ് ഓഫീസറാകാനുള്ള ചവിട്ടുപടി.